Икос 1
Ангельскии чини и праведников сонми непрестанно славят Тя, Царицу всех Богородицу, ходатайствующую о многогрешнем роде христианстем, погрязшем в беззакониих, пребывающем во гресех: даруеши бо ему во утешение и спасение милость Свою чрез многоименныя чудотворныя иконы Твоя, ихже яко звезды небесныя по всей земли нашей зрим. К единому же от сих образу, Неупиваемая Чаша именуемому, припадающе, из глубины сердца взываем Ти: Радуйся, неприступнаго Божества селение; радуйся, непрестанное людей удивление. Радуйся, скорбьми немощи наша очищающая; радуйся, милость Свою чрез чудотворныя иконы Твоя нам низпосылающая. Радуйся, явлением тех скорбная сердца наша возвеселяющая; радуйся, благодарственная Богу пети научающая. Радуйся, пречудное всех к Богу примирение; радуйся, геенны вечныя избавление. Радуйся, Владычице, Неупиваемая Чаше, духовную нашу жажду утоляющая.
Кондак 2
Видящи, Пресвятая Владычице, сердечныя скорби, душевныя муки и искреннее покаяние людей, одержимых недугом, губительною болезнию пианства, благоволила еси явити богоспасаемому граду Серпухову милость Твою явлением пречуднаго образа Твоего, именуемаго Неупиваемая Чаша, да вси к нему припадающии с верою и сокрушенным сердцем, получивше исцеление от тяжкаго недуга своего, из глубины души вопиют: Аллилуия.
Икос 2
Разум неудобь разумеваемый трикратнаго явления преподобного Варлаама и повеления его путьшествовати в богоспасаемый град Серпухов разумети ища, человек некий, страждущий недугом пианства, отъиде во град Серпухов и обрете тамо во монастыре Владычнем икону Твою святую, Неупиваемая Чаша именуемую. Мы же, видяще таковое Твое о нас, грешных, попечение, с благоговением вопием Ти: Радуйся, чрез благочестивых людей славу чудес Твоих грешником открывающая; радуйся, Путеводительнице прозорливая, путь спасения им показующая. Радуйся, всеблагая наша Наставнице, любовию Твоею нас привлекающая; радуйся, за вся благодеяния Твоя благодарению нас научающая. Радуйся, скорбь нашу в радость претворяющая; радуйся, несумненною надеждою нас увеселяющая. Радуйся, губительныя страсти наша разрушающая; радуйся, благим намерением способствующая. Радуйся, Владычице, Неупиваемая Чаше, духовную нашу жажду утоляющая.
Кондак 3
Сила Вышняго благодатию Владычицы укрепи некоего человека, страждущаго недугом пианства, егда он, нозе разслабленныя имый, иде во град Серпухов, повеление Богоматере, чрез преподобнаго Варлаама возвещенное, исполняя, и обрет Пречистыя Богоматере икону, абие исцеле от недуга своего душевнаго и телеснаго и из глубины души воззва Богу: Аллилуия.
Икос 3
Имуще источник неоскудный и неупиваемую чашу небесных дарований, не токмо людие града Серпухова, но и вси православнии христиане от иных градов и весей к Твоему пречудному образу притекают и, пред ним получающе исцеление, припадающе, благодарственными усты вопиют Ти: Радуйся, Купеле, в нейже вся наша скорби погружаются; радуйся, Чаше, еюже радость спасения нашего восприемлем. Радуйся, немощи наша телесныя врачующая; радуйся, язвы греховныя исцеляющая. Радуйся, страсти наша силою молитв Твоих укрощающая; радуйся, коемуждо просящему по потребе его подающая. Радуйся, милостей сокровище нам открывающая; радуйся, едина Мати, милосердие нам являющая. Радуйся, Владычице, Неупиваемая Чаше, духовную нашу жажду утоляющая.
Кондак 4
Бурю внутрь имуще помышлений сумнительных, но с искренним покаянием притекающе к Твоему неизреченному милосердию, одержимии пианственною страстию получают исцеление и из глубины сердца вопиют Ти: Аллилуия.
Икос 4
Слыша Господь тяжкия скорби жен, стариц и детей, ихже сродницы обуреваеми суть пианственною страстию, дарова им Твою, Владычице, икону, у неяже вси притекающии обретают утешение и радость духовную и вопиют Ти со слезами: Радуйся, Агнице, рождшая Агнца, вземлющаго грехи мира; радуйся, Чаше, черплющая нам радость от источника безсмертия. Радуйся, скорбных матерей утешение, ненадежных надежде; радуйся, скорбящих отрадо. Радуйся, благодати явление; радуйся, веры утверждение. Радуйся, волнение страстей утишающая; радуйся, руку помощи Твоея требующим простирающая. Радуйся, Владычице, Неупиваемая Чаше, духовную нашу жажду утоляющая.
Кондак 5
Боготечную звезду, честную икону Твою показала еси нам, Владычице, юже зряще и с верою сердечною молящеся Тебе, Богородице, глаголем: исцели пианственною и всякою иною болезнию души и тела страждущих, верных же научи воспевати хвалу Богу: Аллилуия.
Икос 5
Видяще чудеса преславная и знамения пречудная, бываемая не токмо от иконы Твоея, Богомати, во граде Серпухове явленныя, но и от всех по подобию сея иконы написанных изображений, припадающе к ним смиренно, вопием Ти: Радуйся, скоропредстательная Помощнице усердно к Тебе притекающих; радуйся, благосердая Услышательнице молений наших. Радуйся, град Серпухов благословением Твоим осенившая; радуйся, и в пределах Московских славу чудес Твоих показавшая. Радуйся, серпуховская Владычице, сокровище исцелении неоскудное; радуйся, инокинь тамо благо подвизающихся всемощная покровительнице. Радуйся, ведущим брань противу мира, плоти и диавола добрая поспешнице; радуйся, и в мире благочестно живущих усердная Заступнице. Радуйся, Владычице, Неупиваемая Чаше, духовную нашу жажду утоляющая.
Кондак 6
Проповедающе чудеса Твоя, Богородительнице, от иконы Твоея, Неупиваемая Чаша именуемыя, бываемая, молим Тя, Пречистая, со слезами: избави всех нас от падений греховных, научающи воспевати Богу: Аллилуия.
Икос 6
Возсияла еси в светлости Божественныя славы, Дево Богородице, на Младенца Предвечнаго Господа нашего Иисуса Христа зрящая, Иже в сосуде аки в неупиваемой чаше предстоит, якоже Тя видим, изображенную на иконе Твоей, Неупиваемая Чаша таинственно нареченной, от неяже избавление пианственныя болезни притекающим с верою даруеши, во еже пети Тебе гласы немолчными сице: Радуйся, о Нейже радуется и торжествует Ангельский собор и человеческий род; радуйся, Еяже слава превосходит похвалы земныя и небесныя. Радуйся, таинственным изображением Сына в сосуде тайну Божественныя Евхаристии нам открывающая; радуйся, рожденнаго Тобою Агнца, всегда ядомаго и никогдаже иждиваемаго, нам указующая. Радуйся, Чашею Жизни и безсмертия ко вратам Вечныя Жизни нас приводящая; радуйся, источником нетления и радости жаждущия души напаяющая. Радуйся, неисчетною благостынею не оставляющая презреннеиших и отверженнейших; радуйся, от рова погибели сердоболием, Твоим исхищающая ненадежных. Радуйся, Владычице, Неупиваемая Чаше, духовную нашу жажду утоляющая.
Кондак 7
Хотя некии человек возблагодарити Тя, Владычице, за исцеление от пианственнаго недуга, украси Твою пречудную, Богомати, икону, во граде Серпухове пребывающую, из глубины сердца воспевая Богу: Аллилуия.
Икос 7
Новое чудо видим, Владычице, от иконы Твоея святыя: страждущии бо пианственным недугом некии раб Божии Стефан, прибегая к Твоему Матернему предстательству, от тяжкаго недуга своего избавися и, благодаря Тя, благолепными дарами икону Твою украси, и, припадая к неи, со слезами возопи Тебе тако: Радуйся, живоносный источнике исцелении; радуйся, чаше небесная божественных даровании. Радуйся, реко исцелении приснотекущая; радуйся, море, всех наших страстей потопление. Радуйся, благодарственная приношения не отвергающая; радуйся, сердца благочестивых людей возвеселяющая. Радуйся, крепкия веры Подательнице; радуйся, всех благих деянии Исполнительнице. Радуйся, Владычице, Неупиваемая Чаше, духовную нашу жажду утоляющая.
Кондак 8
Странно и сумнительно неверующим слышати, како икона Твоя святая «Неупиваемая Чаша» божественных исцелении источает чудеса. Мы же, верующе словеси Твоему, Владычице, реченному к перво-писаннои иконе: «С тобою Моя благодать и сила», — веруем, яко от сея иконы Твоея благодать Твоя выну истекает. Темже, благоговейно покланяющеся, лобызаем ю, вопиюще Богу: Аллилуия.
Икос 8
Все упование людие, страждущии болезнию пианства, на Тя, Владычице, возлагают, прекланяешися бо немощем и страстем нашим. Кто бо нас, грешных, изведет из рова погибели и нищеты духовныя и телесныя, аще не Ты, Владычице! Сего ради прекланяем колена пред Твоим пречудным образом и вопием Ти тако: Радуйся, по молитве грешных людей, призывающих Тя в помощь свою, небесную благодать низпосылающая; Радуйся, глубину милосердия Твоего грешным показующая. Радуйся, доблести и веры богатство неистощимое; радуйся, духа уныния и боязни отгнание. Радуйся, отчаявшихся и ненадежных ободряющая; радуйся, удрученным болезнию пианства руку помощи простирающая. Радуйся, терпеливых страдальцев дарми благодатными утешающая; радуйся, суетныя радости мира сего презирати нас научающая. Радуйся, Владычице, Неупиваемая Чаше, духовную нашу жажду утоляющая.
