Последование артоса.
В день святыя пасхи по отпусте божественныя литургии, вземшу иерею образ воскресния Христова, диакону же приимшу от инаго артос царскими враты, аще во олтаре будет. [В неких же обителех на аналогии во храме на сие устроенном купно со образом воскресния господня поставляется: и ко анафоре антидору идуще целуют первее праздник, таже артос. И диакон вземлет его из места, с панагиаром, и в руках несет, предыдущей лампаде, или двема. настоятель же и братия вся по чину своему исходят со артосом, [сиесть хлебом, просфорою всецелою, на се со крестом на ней изображенным уготованною,] из церкве в трапезу. Вместо псалма, Вознесу тя Боже мой: Христос воскресе. поюще: Параекклисиарху же и прочей братии во вся звоны ударяющим. И вшедше в трапезу поставляют праздник и артос на местех их. И глаголет настоятель: Христос воскресе, трижды. И Отче наш: Слава, и ныне: Господи помилуй, трижды, благослови. Настоятель, Христе Боже благослови ястие: и прочая. мы же, Аминь. Седаем кийждо на месте своем, со всяким безмолвием, и благоговеинством: и бывает утешение велие на вся и чтение по обычаю. По обычной трапезе, востающе братия, поставляют артос на трапезе, поюще: Христос воскресе: трижды, и Господи помилуй, трижды: благослови. Таже келарь прием, обычное прощение от настоятеля и братии: благословите мя отцы святии, и простите мя грешнаго. Мы же речем: Бог да простит и благословит. Таже снем камилавхий, возгласит, вместо, Велико имя святыя троицы: Христос воскресе, единожды. Нам же отвещающим: Воистинну воскресе: Тойже назнаменав крестообразно артосом, глаголет: Покланяемся его тридневному воскреснию. Полагает и на панагиаре. Потом приносит келарь артос с панагиаром к настоятелю, и целует артос, и вся по нем братия, поюще песнь 9–ю, ирмос, Светися, светися: и прочия оба тропари тоя песни. И паки ирмос, Светися, светися: По целовании же просфоры от всех, возвратився келарь поставляет ю пред настоятелем, и речет стих: молитвами святых отец наших, Господи Иисусе Христе Боже наш, помилуй нас. И мы, Аминь. и поем, Христос воскресе: трижды. Слава, глаголем впакои, Предварившия утро: И ныне, кондак, Аще и во гроб: Господи помилуй, трижды. благослови. Настоятель: благословен Бог милуяй и питаяй нас от своих богатых даров, своею благодатию и человеколюбием, всегда, ныне и присно, и во веки веков. И мы, Аминь. Таже настоятель: Бог да простит и помилует послуживших нам. И абие исходит из трапезы в церковь. И братия вся по чину своему, предыдущу иерею со иконою воскресния Христова, и диакону со артосом, и клириком поющим: Христос воскресе: Тогда параекклисиарх, и прочая братия ударяют во вся звоны. Вшедшу же настоятелю и братии в церковь, иерей и диакон поставляют на своих им местех икону и артос. Мы же поем: И нам дарова живот вечный: И идем в келлии своя. Сице же возследуется целование о просфоре, яже есть артос чрез всю седмицу святыя светлыя недели, даже до субботы.
[Смотри] Подобает ведати: яко аще случится брату коему отити ко господу в сию седмицу пасхи: И о сем зри всего последования сих дней о усопших в требнике.
Во святую и великую неделю пасхи вечера.
По 9–м часе во светильничном, облачится настоятель во всю священную одежду. И став пред святою трапезою с кадильницею знаменует крестовидно, и возглашает глаголя: благословен Бог наш: И нам отвещающим: Аминь. И той начинает: Христос воскресе из мертвых, смертию смерть поправ, и сущим во гробех живот даровав. Трижды. И мы тойже поем, трижды. И глаголет настоятель преждереченыя стихи: 1–й, Да воскреснет бог: 2–й, яко исчезает дым: 3–й, Тако да погибнут грешницы: 4–й, Сей день, егоже сотвори господь: Мы же на кийждо стих поем: Христос воскресе: по единожды. Слава: Мы же, Христос воскресе: И ныне: Мы же, Христос воскресе: И паки настоятель: Христос воскресе из мертвых, смертию смерть поправ: И мы конец, И сущим во гробех живот даровав. Таже ектениа великая: Миром господу помолимся.
[Смотри] [Подобает ведати: яко по внегда начати, иерей кадит святую трапезу по обычаю, и весь олтарь. На вечерни, на Господи воззвах: На Утрени, в начале канона исходит и кадит храм и лики и братию по обыкновенному чину.] Посем, Господи воззвах, во глас 2. И поем стихиры на 6: воскресны 3, глас 3: Прежде век: и анатолиевы 3: Слава, спасительную песнь поюще: И ныне, богородичен: Прейде сень: Вход со евангелием. Свете тихий: таже, Прокимен великий, глас 6: Кто Бог велий, яко Бог наш: Стих 1–й, Сказал еси в людех силу твою: Стих 2–й, И рех: ныне начах, сия измена десницы вышняго: Стих 3–й, Помянух дела господня, яко помяну от начала чудеса твоя. И паки: Кто Бог велий: По прокимене же возглашает диакон, И о сподобитися чтет евангелие настоятель во олтари, Иоанна, зачало 65: Сущу позде в день той: Конец, Не иму веры Посем ектениа: Рцем вси: и Сподоби Господи в вечер сей: Таже, Исполним вечернюю молитву: И по возгласе поем стихиру воскресну, глас 2, воскресение твое Христе спасе: Таже стихиры пасхи, глас 5: Пасха священная: с припевы их. Слава, и ныне: воскресния день: Христос воскресе: трижды, кроме конца стихиры. Таже диакон: Премудрость. Мы же, благослови. Настоятель: Сый благословен Христос Бог наш: И мы, утверди Боже: Таже настоятель, вместо, Слава тебе Христе Боже: Христос воскресе из мертвых: И мы, И сущим во гробех живот даровав. И абие глаголет отпуст со крестом: Христос воскресый из мертвых: И прочая, якоже изъявися в конец утрени. [Смотри] И целуем святыя иконы. И входим в трапезу, и глаголем: Христос воскресе: трижды. Слава, и ныне: Настоятель, Христе Боже благослови: По востании же от трапезы, глаголем: Христос воскресе: трижды. Слава, и ныне: Настоятель, С нами Бог своею благодатию: И тако творим во всю седмицу светлую вечерни воследование.
В понедельник светлыя седмицы на Утрени.
Прежде начала вжигает кандила и свещи параекклисиарх: Таже клеплет в великий кампан, и в прочия. И собравшимся нам во храм, иерей полагает обычный поклон настоятелю, и отходит во святый олтарь, и взем кадильницу стоит пред святою трапезою, кроме священническия одежды, епитрахилий точию возлож сверх мантии: кадит крестообразно, глаголя: Слава святей и единосущней: И начинаем тропарь, Христос воскресе: трижды. И нам тожде отвещающим. и поем: Христос воскресе: со стихи его, якоже изъявися в неделю утра и вечера: в мирских же храмех облачится иерей в ризы. Таже, ектениа великая. И по возгласе абие поем канон: воскресния день: ирмосы по дважды, тропари же на 10, с припевом: Христос воскресе: В слава же, и И ныне, глаголем богородичны Господина феофана, и Господина иосифа. Катавасиа оба лика вкупе: воскресния день: И последи: Христос воскресе: трижды. И глаголем сие во всю седмицу вкупе со ирмосы на 14. По 3–й песни, впакои: Предварившия утро: И чтение на 1- ю книгу: В начале бе слово: от Иоанна толкование златоустаго. [от сего бо дне начинаем сию книгу, и даже до всех святых совершаем.] По 6–й песни кондак: Аще и во гроб: и икос, и чтение. И по нем: воскресение христово: трижды. И воскрес Иисус от гроба: трижды. И абие прочия песни. 9–ю песнь поем с припевы. Таже светилен: Плотию уснув: трижды. На хвалитех, Всякое дыхание: И поем стихиры воскресны, на 4, глас 2: Всякое дыхание и вся тварь: И стихиры пасхи, с припевы их, якоже предписася во утрени недели. И ектении, и отпуст, и час 1–й. Сице же бывает служба утрени, во всю седмицу светлую. Творим же и литию вне обители.
[Смотри] Подобает ведати: яко творим исхождение днесь вне монастыря, предносяще хоругви. В руках же держаще святое евангелие, честный крест, и иконы, воскресния Христова, и пречистыя Богородицы. Поем канон пасхи с богородичны, на 8, Катавасиа, ирмос тойже. По 6–й песни, последи евангелиа глаголем: воскресение христово: трижды. Таже, стихира: воскрес Иисус от гроба: трижды. Таже 6–я, 8–я и 9- я песни: и прочее молебна. На Литургии, антифоны пасхи непременно, якоже указася в неделю пасхи. Прокимен апостола, глас 8. Во всю землю изыде вещание их: Стих: небеса поведают славу божию: Апостол деяний, зачало 2: Возвратишася апостоли во иерусалим: Аллилуиа, глас 1: Исповедят небеса чудеса твоя Господи. Стих: Бог прославляемь в совете святых. евангелие Иоанна, зачало 2: бога никтоже виде нигдеже: Причастен: Тело христово: На трапезе бывает утешение великое братии.
В понедельник светлыя седмицы вечера.
Во светильничном, по Христос воскресе, и прочих, Поем: Господи воззвах, на глас 3: и поем стихиры на 6: воскресны 3: Твоим крестом Христе спасе: И анатолиевы 3. Слава: Недостойно стояще в пречистом дому твоем: И ныне, богородичен: Како не дивимся: Вход с кадильницею. Свете тихий: Прокимен великий, глас 6: Бог наш на небеси и на земли, вся елика восхоте, сотвори. Стих: Во исходе израилеве от египта, дому иаковля: Стих: Море виде и побеже, иордан возвратися вспять. Стих: Что ти есть море, яко побегло еси? И паки: Бог наш на небеси и на земли: Таже: иерей, или диакон глаголет: Рцем вси, и прочее ектении. Сподоби Господи: Таже: Исполним вечернюю: И по возгласе, на стиховне стихира воскресна, глас 3: страстию твоею Христе: И стихиры пасхи: с припевы их. Христос воскресе: трижды. И отпуст.
