Аще ли коему святому на Утрени поется славословие, И На Литургии по входе, кондака, Со святыми упокой: не глаголем: но глаголем на Слава: кондак святаго рядоваго, И ныне: кондак храма Христова, или Богородицы. Аще ли несть храма Христова и Богородицы, И ныне, Предстательство христиан:
В субботу вечера к недели.
По Ныне отпущаеши, и по трисвятом, тропарь воскресн гласа: Слава, святаго: И ныне, богородичен воскресн, по гласу тропаря святаго: Аще ли несть тропаря святому, глаголи тропарь воскресн. Слава, и ныне, богородичен его. [Смотри] Аще ли два святых с тропари, И глаголем тропарь воскресн: Слава, святаго: И ныне, богородичен воскресн по гласу тропаря: другаго же святаго тропарь не глаголется: понеже на вечерни 4 тропаря не глаголются. На повечерии глаголем кондак воскресн.
В неделю на Утрени на Бог господь. Тропарь воскресн, дважды: Слава, святаго: И ныне, богородичен воскресн, по гласу тропаря святаго. 1 богородичен настоящаго гласа глаголи по тропаре воскресном на Слава, и ныне, по 1–м седальне: рядоваго же богородична не глаголем. [Смотри] Аще ли случится в неделю другий святый имеяй тропарь: Глаголем на Бог господь, тропарь воскресн единожды, и святаго перваго единожды. Слава, другаго святаго. И ныне, богородичен воскресн, по гласу последняго тропаря. [Аще же в неделю тропаря святому не будет, тогда глаголем на Утрени, на Бог господь, тропарь воскресн гласа, дважды: Слава, и ныне, богородичен его. По 1–м же седальне глаголем богородичен рядовый. По славословии тропарь воскресн един.] На часех, тропарь воскресн: Слава, святаго: И ныне, богородичен часов. По Отче наш, кондак воскресн.
На Литургии по входе, Глаголем тропарь воскресн, и храма Богородицы, и храма святаго, и святаго рядоваго, глаголем же и другий тропарь, аще есть. Таже кондак воскресн, и храма святаго. Слава, святаго рядоваго: И ныне, храма Богородицы. Аще ли другий святый имеяй кондак, Слава, кондак другаго святаго: И ныне, храма Богородицы. А идеже несть храма Богородицы, а храм христов: И ныне, кондак воскресн. А идеже несть храма Христова и Богородицы, И ныне, кондак: Предстательство христиан:
Ведомо же буди и о сем. Аще случится когда в седмичныя дни, кроме субботы и недели святаго, емуже вход, или славословие, или полиелей, или бдение: тогда глаголем на вечерни и на Утрени, и на часех, тропарь и кондак, якоже прежде указася. точию на вечерни по трисвятом последнем: и на Утрени, на Бог господь, и по славословии: по тропаре глаголем богородичен воскресн, по гласу тропаря святаго. А на повечерии по Достойно и по трисвятом, кондак святаго. А богородична от меньших, такожде и крестобогородична в среду и пяток по тропаре, в тыя праздники не глаголем. А по входе На Литургии глаголем такожде тропарь и кондак, якоже прежде явлено есть: точию в сия дни, дне тропаря и кондака, Со святыми упокой, не глаголем.
[Смотри]
Аще ли случится в субботу коего святаго, емуже славословие, или вход кроме полиелеа:
В пяток вечера, по Ныне отпущаеши, и по трисвятом тропарь святаго: Слава, и ныне, богородичен воскресн настоящаго гласа. На повечерии, кондак святаго.
На Утрени, на Бог господь, Тропарь святаго, дважды. Слава, и ныне, богородичен воскресн. По славословии, глаголем тропарь святаго: Слава, и ныне, богородичен настоящаго гласа. На часех, же тропарь и кондак глаголем, якоже выше указася.
На Литургии же, но входе глаголем тропари сице: Прежде тропарь храма Христова, или Богородицы, и святаго рядоваго, таже кондак храма Христова. Слава, кондак святаго: И ныне, храма Богородицы. [Смотри] А идеже храм христов, а Богородицы несть: И ныне, кондак храма, Христова. А идеже храма Христова, и Богородицы несть: И ныне, Предстательство христиан:
Аще ли случится в субботу коего великаго святаго, имущаго полиелей.
В пяток на вечерни, по трисвятом последнем, тропарь святаго: Слава, и ныне, богородичен воскресн гласа. На повечерии, по Достойно и по трисвятом, кондак святаго един.
На Утрени в субботу, На Бог господь, тропарь святаго дважды: Слава, и ныне, богородичен настоящаго гласа. По славословии тропарь святаго единожды. Слава, и ныне, богородичен настоящаго гласа. На часех, тропарь и кондак святаго.
На Литургии. По входе тропарь храма Христова, или Богородицы, и святаго празднуемаго. Посем кондак храма Христова: Слава, кондак святаго празднуемаго: И ныне, храма Богородицы. А идеже храм христов, а Богородицы храма несть: И ныне, глаголем кондак храма Христова. А идеже храма Христова и Богородицы несть, глаголем тропарь храма святаго, или святыя, и святаго празднуемаго, таже кондак храма святаго, или святыя: Слава, рядоваго святаго, И ныне: Предстательство христиан: Дне же тропаря и кондака не глаголем, понеже тогда октоих не поется.
[Смотри] Аще же бденнаго святаго служба пета была в субботу,
Тогда тропари по входе глаголем сице: прежде тропарь храма Христова, или Богородицы, и святаго бденнаго. посем кондак храма Христова: Слава, святаго бденнаго: И ныне, храма Богородицы. Аще же храма Христова и Богородицы несть, Глаголем прежде тропарь бденнаго святаго: Слава, кондак его, И ныне: Предстательство христиан: А идеже храм христов, а Богородицы храма несть: И ныне, глаголем кондак храма. Храма же святаго На Литургии по входе, егда бдение святаго бывает, тропаря и кондака не глаголем никогда.
[Смотри] Такожде глаголем, тропари и кондаки На Литургии по входе, и во иныя седмичныя дни и в неделю, егда бдение бывает святаго.
[Смотри]
Ведомо же буди и о сем, аще случится в неделю святаго, емуже бывает бдение, или полиелей, или святаго, емуже служба поется на 6, кроме полиелеа.
И о тех службах, и о тропарях и о кондаках писася указ напреди книги сея, во главе 4, 5 и 6–й.
Аще ли случится святаго. коего в неделю, емуже вход бывает, или славословие.
В субботу на повечерии, по Достойно, и по трисвятом, глаголем кондак святаго един, а тропарь на вечерни, и на Утрени, и на часех, и На Литургии по входе, глаголем якоже указася в воскресной службе, с полиелеем святаго, егда случится в неделю.
Подобает ведати и о сем, како глаголются тропари и кондаки по вся дни, в предпразднствах и попразднствах христовых, и богородичных праздников кроме недели.
На вечерни, по Ныне отпущаеши, и по трисвятом, тропарь святаго, аще есть: Слава, и ныне, праздника. Аще ли случится быти два святых: И глаголем по трисвятом, тропарь перваго святаго: Слава, другаго: И ныне, праздника. Аще ли несть святому тропаря, тогда глаголем един тропарь праздника. На повечерии, по Достойно, и по трисвятом, кондак праздника.
На Утрени, на Бог господь: Тропарь праздника, дважды: Слава, святаго: И ныне, праздника: Аще ли два святых, и кийждо их имать тропарь, тогда тропарь праздника, единожды: и святаго перваго, единожды: Слава, другаго святаго: И ныне праздника. По Благо есть, и по трисвятом, тропарь, якоже на вечерни. Аще ли два святых, глаголем такожде якоже на вечерни.
На часех глаголем в начале тропарь праздника: Слава, святаго: И ныне, богородичен часов: По Отче наш, кондак праздника: глаголем непременно на всех часех. Аще ли случатся два святых: И тропари их пременяюще глаголем. Аще ли несть святому тропаря, глаголем на часех тропарь и кондак праздника.
На Литургии по входе, Глаголем тропарь праздника, и храма Богородицы: или храма святаго. и святаго рядоваго. таже кондак храма Богородицы. Слава, святаго рядоваго. И ныне, праздника. Христова же храма тропаря и кондака не глаголем.
Аще ли предпразднство, или попразднство Богородицы. И по входе глаголем прежде тропарь храма Христова, и праздника, и святаго рядоваго, аще есть: аще и другий святый имеяй тропарь, глаголем его. Таже кондак храма Христова: Слава, святаго: И ныне, праздника Богородицы. А Богородицы храма, тропаря и кондака не глаголем.
В предпразднства всех праздников христовых и Богородицыных.
На вечерни, и на Утрени, и на часех, и На Литургии, по входе, во всей церковной службе, глаголем тропарь и кондак предпразднства, и святаго рядоваго, якоже в попразднствах владычних и богородичных праздников. Дне же не глаголется, зане октоих не поется.
Аще ли случится предпразднство, или попразднство в седмичныя дни, кроме недели с полиелейным святым, или емуже и бдение бывает.
По Ныне отпущаеши, и по трисвятом, тропарь святаго: Слава, и ныне, праздника. На повечерии, кондак святаго: Слава, и ныне, праздника.
