Яко Тебе подобает всякая слава, честь и поклонение, Отцу и Сыну и Святому Духу, ныне и присно и во веки веков.
Аминь.
БОЖЕ ВЕЛИКИЙ И ВЕЧНЫЙ, един истинный и праведный, един щедрый и милостивый: да приидет Дух Твой на нас, и сила Твоя да осенит нас; простри от святаго жилища Твоего невидимую руку Твою, и благослови всех нас, и даждь нам по благости Твоей неизменно пребыти в путех воли Твоея, и даже до последняго издыхания нашего неотступно покрый нас безмерным Твоим благоутробием.
Ты бо един еси Защититель наш и Покровитель, и Тебе славу возсылаем, Отцу и Сыну и Святому Духу, ныне и присно и во веки веков.
Аминь.
Прошения о храме и о монастыре
ГОСПОДИ ИИСУСЕ ХРИСТЕ, пред мироискупительною Страстию Твоею моливыйся Отцу Твоему, да вси исповедающии Имя Твое едино будут, удовли вся ны к совершению заповеди Твоея сея, силою и наитием Всесвятаго Духа Твоего; молим Ти ся, услыши и помилуй.
ИИСУСЕ ХРИСТЕ, Боже Спасителю наш, раздаянием огненных языков в пятидесятный день вся языки призвавый в соединение, молим Тя, низпосли на ны дар Духа Твоего Святаго, да исполнятся сердца наша истинныя любве ко искреннему нашему и ко всякому разумному созданию Твоему; молим Ти ся, услыши и помилуй.
Еще молимся о милости, жизни, мире, здравии, спасении, и благопоспешении рабов Божиих (имена); благодатию и щедротами Твоими, Господи, исполни вся прошения их; прости им всякое согрешение вольное и невольное; благоприятны да будут мольбы и милостыни их пред Престолом владычествия Твоего; покрый их от враг видимых и невидимых, от всякия напасти, беды и скорби свободи, и даждь им мир, здравие и долгоденствие; молим Ти ся, милосердне Господи, услыши ны и скоро помилуй.
Призри, Владыко Человеколюбче Господи, милостивным Твоим оком на рабы Твоя сия (имена) и услыши недостойная моления наша, с верою приносимая Тебе. Сам бо рекл еси, Господи: вся елика молящеся просите, веруйте, яко приимите, и будет вам. Сего ради и мы, аще и недостойнии, уповающе на милость Твою просим: подаждь благость Твою, рабом Твоим сим и исполни благая желания их, в мире и тишине вся дни их соблюди; молим Ти ся, всещедре Господи, услыши ны и скоро помилуй.
БОЖЕ ОТЧЕ ВСЕДЕРЖИТЕЛЮ, Тебе, создавшему нас зиждем мы храмы немощными руками нашими из мертвых камней, но Ты благоволением благости Твоея сотвори нас быти живыя храмы Духа Твоего Святаго; молим Ти ся, услыши ны и помилуй.
БОЖЕ, БОЖЕ НАШ, в нищете и изгнании суще, не имамы ниже места, ни силы, ни власти что-либо создати, Ты же, благий Создателю всяческих, неизреченным могуществом Твоим утверждаяй всю тварь, утверди и наших рук малое дело сие; молим Ти ся, услыши и помилуй.
ГОСПОДИ ИИСУСЕ ХРИСТЕ, приступльше ко Святому Твоему жертвеннику да принесем Тебе, Богу нашему, безкровную службу, Тобою нам преданную чрез святыя Твоя апостолы, и просим и молим Тя, всеблагий Господи, призри милостивно на службу нашу, и не отвержи приношения нашего, но услыши ны и помилуй.
ОТЧЕ БЛАГИЙ И СВЯТЫЙ, щедрый и милостивый, призри человеколюбно на молитву нашу, и прииди во еже спасти нас, и егда призывати нам страшное Имя Твое, милостивно сниди до нас, и присно пребуди с нами, якоже пребывал еси со святыми Твоими апостолы; молим Ти ся, услыши и помилуй.
ГОСПОДИ БОЖЕ НАШ, во дни оны премудрый Соломон взываше к Тебе, моляся: да будут очи Твои день и нощь отверсты на воздвигнутый им храм, призывание же Имене Твоего святаго на услышание молитвы, еюже молятся раби Твои; и ныне, Владыко Святый, призри милостивно на сей малый и убогий храм, и сотвори его быти местом пребывания Имене Твоего, и домом молитвы ради всех народов, благоугодныя пред Тобою; молим Ти ся, услыши и помилуй.
ОТЧЕ БЛАГИЙ, Владыко многомилостиве, благоволением Твоим призри на скорби наша, и посетив нищету нашу, спаси нас, да будем наследницы во славе святых Твоих, от века Тебе благоугодивших; молим Ти ся, услыши ны и помилуй.
СЫЙ, ВЛАДЫКО Боже Вседержителю, сниди к нам, милосердия ради милости Твоея, и неотступно пребуди с нами, низпосылая благодать Святаго Духа на приношения наша, яко низпосылал еси в века на жертвы отцев наших, благоугодивших пред Тобою; молим Ти ся, услыши и помилуй.
ОТЧЕ СВЯТЫЙ, не отврати Лица Твоего от нас, яко скорбим; приими словесную сию службу нашу, приносимую Тебе сердцем сокрушенным и духом смирения, и сподоби нас воздати Тебе чистую хвалу о благодеяниих Твоих, и в мире глубоцем сохрани нас даже до последняго издыхания; молим Ти ся, услыши и помилуй.
БОЖЕ СВЯТЫЙ, Творче и Содетелю всяческих, немощными рукама мы зиждем Тебе храмы из мертвых камней, в приношение молитв и безкровныя жертвы, Ты же, везде Сый и вся исполняяй, Едине приводяй вся в совершение, сотвори нас быти живое селение Твое, во веки неизменное; молим Ти ся, услыши и помилуй.
ГОСПОДИ БОЖЕ НАШ, пришельцы суще на земли чуждей, не имамы ни места, ниже власти к созиданию храма, достойнаго велелепия Имене Твоего, но Ты, Всеблагий, вся носяй глаголом силы Твоея, утверди и наших рук малое дело сие, и службу нашу милостивно приими; молим Ти ся, услыши и помилуй.
ГОСПОДИ ИИСУСЕ ХРИСТЕ, един сый воистину краеугольный Камень, на Немже зиждется всякая жизнь, призри милостивно на ны, недостойныя рабы Твоя, дерзнувшия в надежде на Тя воздвигнути храм сей, во еже приносити в нем мольбы и моления наша Тебе, Творцу и Спасу нашему, и основай его на твердом камени истиннаго исповедания Твоего, о Ты, основавый землю на тверди ея; молим Ти ся, услыши и помилуй.
ГОСПОДИ ИИУСЕ ХРИСТЕ, Спасе наш, призыванием страшнаго и всесвятаго Имене Твоего, благоволи оградитися месту сему от всякаго действа вражия, и да отступят от него вся противныя силы, и ничтоже вредное да не коснется рабов Твоих, мольбы и прошения своя приносящих Тебе в святем храме сем; молим Ти ся, услыши и помилуй.
ГОСПОДИ ИИСУСЕ ХРИСТЕ, вознеслся еси превыше всех небес и одесную Отца возсел еси в неизреченней славе, прекрасне исполнив еже о нас Отеческое смотрение. Восприяв бо древле падшее Адамово естество и Собою обожив е в славнем вознесении Твоем, спосадил еси на Престоле Предвечнаго Божества. Сего ради излей и на ны, недостойныя, обетованнаго Духа Святаго, и не лиши нас радости прежде сложения мира избранных Твоих; молим Ти ся, всеблагий Христе, услыши нас и помилуй.
ГОСПОДИ ИИСУСЕ ХРИСТЕ, Сыне Божий, един сый основание незыблемое Церкве Твоея, юже Крестом Твоим и смертию стяжал еси, воскресением совершил еси, вознесением благословил еси, Духа же Святаго сошествием освятил и оживотворил еси во веки, Тебе ныне смиренно просим: благослови и ущедри вся ны, недостойныя рабы и рабыни Твоя, и вся потребная к совершению и сохранению храма сего и святыя обители сея, Божественным Твоим Промыслом изобильно подай; молим Ти ся, услыши и скоро помилуй.
ГОСПОДИ, БОЖЕ НАШ, утверждаяй всю тварь могуществом Твоим, утверди немощных рук наших дело, и малому храму сему сотвори быти местом явления славы Твоея, и домом молитвы, ради всех народов, благоугодныя пред Тобою; молим Ти ся, услыши и помилуй.
БОЖЕ И ГОСПОДИ СИЛ, да будут очи Твои день и нощь отверсты на храм сей, и призывание Имене Твоего святаго на услышание молитвы, юже приносят Ти раби и рабыни Твоя; молим Ти ся, услыши ны и помилуй.
ГОСПОДИ ИИСУСЕ ХРИСТЕ, Спасе наш, на камени исповедания Божества Твоего изволивый создати Церковь Твою незыблему и от врат адовых необориму, милостивно призри ныне на немощь нашу, и на камени заповедей Твоих утверди сердца наша, да к Тебе всегда взирающе и Божественным словом Твоим напояеми, и сами мы яко камение живо созиждемся в дом духовен, и храм Духа Твоего Святаго явимся, во еже приносити Тебе, Единому Богу нашему, непорочныя жертвы, благоприятныя пред Тобою; молим Ти ся, услыши и помилуй.
ГОСПОДИ ИИСУСЕ ХРИСТЕ, силою Духа Твоего Святаго возведи ны в след стопам Твоим, и сотвори ны достойны приносити Тебе жертву духовную о гресех наших и о всем мире Твоем, да причастницы суще Божественных Твоих Тайн, обрящем милость Твою в день великий воздаяния Твоего праведнаго; молим Ти ся, услыши и помилуй.
Молитвы о сущих в обстоянии
ПОМОЩНИЧЕ, ИЗБАВИТЕЛЮ И СПАСЕ скорбьми сокрушенных, Владыко Христе, милостию Твоею скоро посети в напасти и скорби сущия рабы Твоя (имена), богатством щедрот Твоих изимаяй я от всякаго озлобления, да в радости спасения Твоего прославят Божественную силу Твою; молим Ти ся, всеблагий наш Спасе и Утешителю, услыши ны и скоро помилуй.
ГОСПОДИ БОЖЕ НАШ, помощь сый безпомощным, надежда отчаянным, заступление всем онеправданным и гонимым Имене Твоего ради, помяни и милостивно посети люди Твоя: иже в девстве и благоговении, в постничестве и в чистем жительстве пребывающих; иже во обителех, в пустынех и горах подвизающихся; иже в сиротстве или вдовстве, иже в заточениих или изгнании, и всякой иной скорби и обстоянии сущих. Сам, Господи, ведый коегождо нужду и прошение, спаси и ущедри; молим Ти ся, услыши ны и помилуй.
