После того, как не нашли в гробе Христа, «рекоша жидове стражем: вы дары вземше от ученик его, и даcте им тело его. Воини же глаголаша: вы законопреступницы не ясте ему веры глаголюшу, яко пострадати имам, и в третий день востати. Грядите и видите гроб его, и камень, и печати, свидетельствуйте. Слышахом бо яко Иосифа, иже погребе Христа, затвористе в темнице, и печатаете двери, и се не обретости его. Дадите вы Иосифа, а мы дадим вам Исуса». (Гл. 26-я, лист 144 и 145.)
«По вознесении убо Господа нашего Исуса Христа, Тиверию Кесарю, единоначальствующу на земли и обладающу восточными и западными странами, приидоша убо из Иерусалима сестры Лазаревы Марфа и Мария, и Мария Магдалыня (sic) в Рим к Тиверию Кесарю, со многими дарами, и падше поклонишася ему сице глаголюще: о державный и грозный Кесарю, мы убо от земли Мадиамския, приидохом убо державе твоей поклонитися и возвестити страшное и великое дело Божие. Яко Бог родися от пречистыя девы Марии в Вифлееме Июдейстем». (Глава 26-я, л. 160-й и 161-й.)
«…Слышав же сие Кесарь, страхом велиим одержим быв, и тихим гласом рече к ним: о жены, во истинну ли тако глаголете; яко таковыи человек явися на земли, и может ли кто таковая чюдеса творити; они же рекоша: ей истинну глаголем, и о том имамы свидетели, иже видеша и слышаша, и аще не веруеши, то сам своима очима узриши. Тогда посла Кесарь во Иерусалим, да призовут бывших недужных и исцелевших от Христа, и Лазаря и Логгина сотника в Рим, свидетельства ради, да видит их веру имет. Егда же приведени быша, и внидоша к Кесарю в полату; тогда трус бысть велии, и потрясеся полата Кесарева, и ужасеся Кесарь с предстоящими. Тогда реша ему предстоящий: о державный и грозный Кесарю, еда сих ради людей тако сотворися чюдо сие, иже приидоша державе твоей поклонитися. Повели убо им изыти вон, да не сокрушится полатное здание, и повели коемуждо человеку по единому входити, да видим коего ради человека сие чюдо бысть. Тогда Кесарь по глаголу их повеле всем изыти из полаты, и изыдоша, и преста полата трестися. И паки повеле по единому входити, и абие начаша входити един по единому. Егда же вниде Логгин сотник паки в полату, тогда паки трус бысть велии, и поколебася полатное основание. Тогда Кесарь с предстоящими вельми убояшася, и не можаху на Логгина зрети. И рече ему Кесарь тихим и смиренным гласом: человече, кто еси ты, и что есть дело твое, повеждь нам, яко зрим тебе ради бываемая, и вси хощем погибнути вскоре. Тогда отвеща ему Логтин: о державный и грозный Кесарю, не мене ради гибель сия бывает, но Христа ради распятаго, понеже риза его святая на мне есть, аз бо при распятии взях ю. Егда бо воин прободе Исуса Христа в ребра копием, тогда изыде кровь и вода, аз же тогда немощен бех очима, и ощутив кровь Христову текущую из тела его, и взем помазах очи свои и бых здрав, и от того часа веровах в него, яко истинный Бог есть. Тогда Кесарь повеле Логгину скоро изыти из полаты, и сняти с себе ризу Христову, и принести ю пред него. Логгин же исшед и сня с себе ризу Христову и принесе ю пред Кесаря. Тиверий же Кесарь взем ризу Христову, и рече к Марфе и Марии: сия риза Христова ли; они же рекоша: ей Христова есть. Он же целова ю. Имяше же Кесарь на лице своем струп велик зело, и не могоша того струпа никия же врачи исцелити. Тогда Марфа и Мария рекоша: о державныи и грозныи Кесарю, послушай нас, аще хощеши здрав быти, то ризою сею святою отри лице свое и будеши здрав. Кесарь же сотвори тако по глаголу их, и отре лице свое ризою Христовою, и в том часе исполнися лице его гноя от струпа онаго, и спаде струп с лица его, и бысть здрав яко николиже болев. И возрадовася радостию велиею зело, и прослави Бога, и рече: Слава Тебе Христе Боже, яко сподобил мя еси слышати о пресвятем имени твоем. И отпусти всех с честию в домы своя». (Глава 29-я, л. 163–166.)
ГЛАВА XXX
«О ПОСЛАНИИ ПОНТИЙСКОГО ПИЛАТА К ТИВЕРИЮ КЕСАРЮ ИЗ ИЕРУСАЛИМА ЕПИСТОЛИИ В РИМ О РАСПЯТИИ ГОСПОДНИ»
«Слышав же Пилат хождение Марфы и Марии к Кесарю в Рим, и убояся зело, и хотя оправдитися написа епистолию к Кесарю, сице глаголя: державному и страшному Тиверию великому Кесарю, Понтийский Пилат раб твой, иже от восточных стран начальство имыи твоею властию и повелением; се пишу твоему величеству, страхом велиим и трепетом многим одержим, о вещи бывшей во граде Иерусалиме». (Гл. 30-я, л. 166 и 166-й.)
«И видев аз крамолу их великую (продолжается донесение Пилата Кесарю), иже творяху на мя подвизающеся, и отдах Его (Христа) воли их. Они же вземши связаша Его, и биша немилостивно, и возведше его на лобное место, и тамо Его распяша. И абие в полудне солнце помрачися, и тьма бысть по всей земли, и луна в кровь преложися. Умершу же Исусу на кресте, завеса церковная раздрася на двое, от верхняго края даже и до нижняго, и земля потрясеся, и камение распадеся, и разседеся земля, и пропасть явися даже до преисподних Ада,[12] и гроби отверзошася, и восташа нецыи от мертвых, ихже тии сами Июдеи именуют и нарицают праведники, патриарх Авраам и Исаак и Иаков, и инии мнози с ними, и явишася мнозем на долг час, и паки не видими быша: яко же свидетельствоваша многи от Июдей видевшии онех пророк и праведник, иже преставишася прежде трех тысящ лет и более. Сия же вся в вечер пятка позде быша, в суботу же в полунощи бысть гром велии с небесе, яко николиже бысть таков, и свет явися светел паче солнца. И явишася мужие зело велицы, одеяни пресветлыми одеждами, и зваху глаголюще: распныися Христос, востав восходит на небо, и вси праведницы, иже во аде порабощеннии, с ним. Оных же пресветлых лиц зовущих бяше число неисчетно. Всю же нощь ту неизреченный глас слышашеся, и в пропастех земных, ихже тогда земля сотвори, и мнози от Июдей, иже тогда на Исуса совет сотвориша, под землю провалишася и погибоша. Сицевым чюдесем аз самовидец быв, и страхом велиим одержим, написах епистолию к твоему величеству, на уведение яже о Христе содеяшася. Доспевшу же писанию в Рим к Тиверию Кесарю, и тогда Кесарь повеле ю чести пред всем множеством князей и народа предстоящих, и вси удивишася и ужасошася. Ярости же исполнився Кесарь, повеле написати епистолию к Пилату, и посла воины привести Пилата в Рим».[13] (Гл. 30, листы 168 и 169.)
Выписываю подлинником следующий псевдоисторический документ:
«Послание Тиверия Кесаря из Рима во Иерусалим к Пилату.
От державнаго и грознаго Тиверия Кесаря Понтийскому Пилату.
Ведомо ти буде, понеже ты не праведно и не повинно смерть навел на Исуса Назарянина, и предал еси Его злонравным и скверным Июдеом на смерть крестную, и не пострадал еси Его ради, но и распята повелел еси мзды ради. Ему же воин некии текши наполни губу оцта и желчи[14] и принесе ко устом, ты же возбранил еси ему, и за сие приведен будеши зде, яко да слово воздаси ми о Христе, Его же неповинно предал еси на смерть. Слышах бо аз о твоей неправде и безумии от некиих жен Марфы и Марии сестр Лазаревых, и Марии Магдалыни, яко Исус тобою осужденный многа чудеса сотворил есть: слепым даде зрети, хромым повеле ходити, и мертвых воскресаше, и всякия болезни словом единем исцеляше. Как убо смел еси предати Его не повинна суща? Но и от лстиваго твоего писания, принесеннаго ко мне, мню яко ты осудил еси Его не праведно на смерть и предал беззаконным жидом».
«Приведену же бывшу Пилату в Рим, слышав Кесарь, яко приспе Пилат, и абие вниде Кесарь в полату, и седе на престоле своем, и вси князи окрест его сташа, и повеле привести Пилата и поставити его пред собою. И рече к нему Кесарь: о злочестиве Пилате, како смел тако сотворити, праведна и неповинна мужа на смерть крестную предал, видев знамения и чудеса велия о мужи оном. Пилат же рече: о державный и грозный Кесарю, аз неповинен есть сему делу, но начинателие повинницы суть Июдейский род. Кесарь же рече, которыи суть; глагола ему Пилат: Архилла и Филипп, Анна и Каиафа и весь род Июдейский. И рече Кесарь: то почто совету их последовал еси окаянне; Пилат же рече: о державныи и грозныи Кесарю, неистовей есть род Еврейский, не повинуется державе твоей. Рече же Кесарь: егда приведоша Его к тебе, ты же чесо ради не сохранил еси Его от убивства смертнаго, и послати Его ко мне жива суща не повелел еси; но послушал еси онех жидов, и распяти такова праведна мужа повелел еси, иже велия знамения сотворил есть, яже ты сам писал еси ко мне о Нем. Паче же и титлу написал еси на кресте: Исус назарянин царь Июдейский. Егда же Кесарю имя Христово изрекшу, абие стоящия Кесаревы Бози златыя и сребряныя и вси идоли внезапу падошася и погибоша аки прах. Кесарь же со предстоящими людьми ужасеся и вострепета, видя внезапну богов своих пагубу, изречения ради имени Исусова. И страх и трепет нападе на всех князей, и на всех людей, и тако отъидоша в домы своя чюдящеся бывшему. Повеле же Кесарь твердо блюсти Пилата. Во утрии же день седе Кесарь на престоле, и повеле привести Пилата пред всеми людьми и князи, и вопроси его, глаголя: о злочестиве Пилате, глаголи истинну, како сотворил еси над Исусом и кто убо бысть распныйся; мы бо токмо имя Его помянухом и боги наша погубихом. Пилат же рече: елика убо писах Твоему величеству: истинно писах, яко вси бози наши, ихже вемы, несть ему точен и един от них. Кесарь же рече: да почто тако смел еси сотворити о Нем, не убоялися моея державы, но паче зло совещал еси о моем царстве, его же боится вся земля и вселенная. Пилат же рече: беззаконнии и непокорливии Июдеи сотвориша сице. Кесарь же исполнився ярости посла во Иерусалим и повеле взяти вся старейшины жидовския, Археллу нечестиваго Иродова сына, и друга его Филиппа, и Архиереев Анну и Каиафу, и привести в Рим. Егда же приведени быша и предсташа Кесарю, вопроси их Кесарь глаголя: почто убо неправедно осудисте и смерти предаете праведнаго мужа, сотворшаго вам толикая дивная и преславная чюдеса. Отвещаша же ему Архиереи и книжницы жидовстии:
