Виршевая поэзия (первая половина XVII века) - Коллектив авторов

Смрадно сокровище чреву сотворивше,

Доволством и воздержанием не ходивше,

Возносящеся в помыслех скверных и злых умышлениях,

И в празднословии, и в блудных пениих,

Во тме неразумия ходивше,

Во дно геены себе потопивше,

Поработишася духу блудному и преблужения —

Горе оставшим, во еже в бозе сыноположения.

Сердца истязающа

И утробы испытовающа

В день судный неблагочестивии обретаются

И небрежливии заповедей божиих осуждаются, —

Человекоугодницы с дияволом осуждаются,

От бесов поругаеми суть, и прелщаются;

Волею согрешающе, покаянию не сподобляются,

Но в юности от смертного серпа пожинаются.

Тело свое растлиша и осквернивше,

Ум омрачивше и мысль отемнивше,

От бесов уязвляются

И геене огненей осуждаются.

Помыслите, каким подобает нам быти, —

Ниже кожа овчая волка может покрыти?

Противу плотским страстем ополчимся.

Востанем на диявола, на брань вооружимся.

А иже живота лишаетъся

Противоборец, крепко вооружаетъся!

Известующа глаголемых явление

И послежде — апостольское учение:

Оставлена будет дщи Сионя, яко сень в винограде

И яко овощное хранилище в вертограде.

Дары избранныя приясте от него, домы создаете.

Винограды возжеленныя насадисте.

Сего ради нощ вам будет видение

И тма вам будет волхование;

Всех человек, еже друг к другу, развращение

И пастырем, еже о овцах, небрежение,

Зане вси в своей воли ходят.

Родителие чад возъненавидят,

Пастырие яко волцы будут,

А священницы лжу возлюбят,

Судии праведное от праведнаго возъмут

И, мздами ослепляемии, неправду приторгнут.

Господу бо Иисусу Христу во плоти на землю пришедшу

От святыя чистыя Девы и едино племя восприимшу,

Иаковли глаголы ко Июде глаголемы

И на господе полагаемы.

О, великаго падения како прелстихомся?

Како к прелестнику приведохомся?

Того мрежами, живи, уловихомся,

Слышаще проповедники, ругахомся.

Ни кадило совершаетъся,

Чтение Писаний не услышится.

Вси бо, во еже бежати и скрытися тщатся,

Удобь ведомии и знаемии тому явятся.

Единой седмице на двое разделшися

И мерзости запустения тогда явльшися:

Паче праведнаго восхищающии

И чистое злато яко нечисто потворяющии

Восплачются, иже мерило неправедно имевшии,

Меры и козлы неправедныя стяжавшии.

Тогда праведницы яко солнце просветятся,

Грешницы же уныли и сетовании явятся.

Праведнии убо да вечно почтутся

И вечных благ насладятся.

Силы бо небесныя подвигнутся

И вся трепетом и страхом свяжутся.

Тебе ради чистоту возлюбихом!

Тебе ради праведницы на земле быхом!

Злая творящи и зло к злу прилагающи,

Свою жизнь во гресех мнозех провождающи,

Бываеши от бесовских соуз [357] воздержима

И водяща тя диявола яко коня браздою содержима,

Не дающа никоея же воли божии тебе сотворити,

Им же возможеши реку огненну угасити,

Плачющеся их глубины сердца своего и воздыхающе

Рыдающе горко и умилно глас испущающе.

Возлюбихом он свет прелестный в сласть себе.

Увы нам, увы, глаголют, кои же пристяжали их к себе,

Яко же земли поколебатися

И небесем устрашитися.

Неправедно судяще, мзды ради неправедныя,

И возглашающе суд неправедный на неповинныя,

Неправеднаго яко праведна сотворяюще,

Сироты немилостиво насилием продавающе, —

Сердца их возмятутся,

Руце и нозе их вострясутся.

В горах и в пещерах и в пропастех земных живите,

Ни во что же песни мирския вмените.

Оболгующих законоположение не возможно,

От сих первие прияти нужно

Долгое пребывание, имений обретение,

К здравию лютаго недуга преложение;

Ниже тако опечалуютъся,

Но умиление осудятъся.

Что ли мните чрево объядшагося и упивающагося,

И на мякких одрох воспитаннаго и покоящагося?

Аще и китом поглощени будут,

Сами же в радости пребывают,

Еже отнюду веселие себе совозрастающе,

Иже в мори потопляемым состраждуще,

Уставы о нужных души страстех уставляя

И зело пристрастное и дряхлое исправляя.

Вящше бо бе подвижущее,

Нежели возбраняющее

Таковых страстей прилоги отражати,

Бесовский находящий полк приимати.

Единою язвою сокрушени в дому веселия

Во время наслаждения:

Стрясшу над ними дияволу храмину,

Виде трапезу с кровию смешену.

Сетование творящи, пиры даеши,

Творящим истаявати свою душу ухищряеши.

Присно печали язву в души хранити —

Остави сия не имущим упования творити.

Еже помысли сия