Премудрость по имени явленная есть,
и не всяк пределом ея касатися весть.
Пути бо ея велицы и строптиви и силнии ими шествуют,
иже мерила ея от превысоких кому поспешствуют.
Та едина престол свой в вышних утвержает,
и любящих своих с собою на нем водружает.
Та всех попремногу в горнем селении обогащает,
от неимущих же еже имеяй что мнит ся и то сокращает.
И сего ради многоведцы от писаний испытна вся да внимают,
и сокровенная суть от века премудростная да разумевают.
Та бо с велиим прещением всех к себе созывает,
и ищущих тоя усердно нетуне призывает.
Приступите бо, рече, ко мне и просветитеся,
и лица вашя не постыдятся и не посрамитеся.
Приступите же по реченному зело к сим настоит,
и к таковым глубинопремудростным сказаниям достоит.
К пределом же рещи Песней Песнем да покусимся,
премудрейшаго о бозе Соломона в творении егда искусимся.
Како от премудрых премудростнейши ими вещает,
иже ни един от книгочтец попросту от них провещает.
Не бе видев существа их в толковании,
и не разрешив в них от части в свидетелствовании.
Дивне о сих древних писаниих читати,
до тридесяти лет человеку не повелеваху их во евреох прочитати [334].
Такова заповедь в законе их с прещением бе,
и таково разсмотрение их к сему просто не бе.
Сокровенныя ради в них тайны предлежащия,
вочеловечения господня бога моего богословии содержащия.
Еже сказует, миросиянно имя его,
от небес на землю являет снитие сего.
Борзостию же серны и еленя владыку уподобляет,
и скаканием премудростне тако приподобляет.
Скочи с небес, глаголет, во утробу девичю,
скочи из ложесн на древо по согрешению человечю.
Вправду глаголет, пойду к горе Змирне
и к холму Ливанску на спасение всемирне.
Сим крин полю и цвет удолием разцветает,
неплоды ражающая церковь от язык процветает.
И к тому под сению закона невесте спати не повелевает,
но на камени прешед и со стены веща, почивая да пребывает.
Зима бо преиде идолослужения неверство,
и веру являет двема заветома благоверство.
Не туне глаголет на широких и пространных ничесо же кто обрящет,
не точию ходяй в путех непорочных, той повсюду вся обрящет.
На ложи моем, речеся, в нощи удобне взысках,
его же возлюби душа моя усердно сего исках.
Сбывшееся виждь на Марфе и Марии ищущи умерша Христа,
обретши не жива, не хотяху от него отлучитися блаженная верста.
Истолкователи же сия премудрейшия книги зде да вводятся,
яки трие велицыи светила от конец вселенских совводятся.
О именованиих же их вначале по сих удобне скажет,
и когождо разными существы усердно там покажет.
Не бе бо лепо невмещаемому где явитися,
и велицей славе от благолепия сокращатися.
Всякое бо началствующее подобное себе имеет,
и всякое существо своим кождо присно владеет.
Сия же от премудростных книг многообразие действует,
и о всех всячески изящне многословствует.
Ту сказуется о бозе пророческими прорицании.
Ту апостолскими проповедми оглашается изрицании.
Ту взывается одр Соломонь в селения божия,
на нем же почивши вси святии уклоняются от безбожия.
Ту глас ударяющь сказует брата моего в двери,
Фомина неверия обличает, воскресения быти увери.
Сих странных глагол прочая зде оставляются,
да не тяжестию читателева ушеса отягчаются.
И не постигнет нас время повести деюще,
блуднаго сына отшед на страну далече беззаконнующе.
Той гладом скончаваяся, неслышанием слова божия,
православнии же да хранятся выну от такова безбожия.
Он пребываше в земли забвенней, иде же бог не живяше,
мы же в таковом селении обитаем, иде же бог присно живяше.
О сих имам и печать засвидетелствуему о истинне,
всяк же богочтец да весть быти всегда во истинне.
